काठमाडौं। आधुनिक कृषि यन्त्र तथा प्रविधिको प्रदर्शनीमा यसपटक राउटे समुदायका परम्परागत सीप र स्थानीय उत्पादनले पनि स्थान पाउने भएका छन् ।
काठमाडौंको भृकुटीमण्डपमा आगामी मंसिर ४ देखि ६ गतेसम्म आयोजना हुने अन्तर्राष्ट्रिय कृषि यान्त्रीकरण प्रदर्शनीमा राउटे समुदायका उत्पादन प्रदर्शन तथा बिक्रीका लागि दुईवटा स्टल निःशुल्क उपलब्ध गराइने भएको छ । कृषि यान्त्रीकरणसँगै रैथाने प्रविधि, परम्परागत सीप र स्थानीय उत्पादनको संरक्षण तथा प्रवर्द्धन गर्ने उद्देश्यले राउटे समुदायलाई प्रदर्शनीमा सहभागी गराउन लागिएको आयोजकले जनाएको छ । नेपाल कृषि मेसिनरी व्यवसायी संघ (नामिया) का अध्यक्ष कृष्ण शर्माका अनुसार राउटे समुदायका उत्पादनलाई बजार र उपभोक्तासम्म पुर्याउने उद्देश्यले निःशुल्क स्टलको व्यवस्था गरिएको हो। ‘कृषि यान्त्रीकरणको प्रवर्द्धनसँगै हाम्रो रैथाने सीप, प्रविधि र स्थानीय उत्पादनको संरक्षण तथा प्रवर्द्धन पनि उत्तिकै महत्त्वपूर्ण छ । त्यसैले राउटे समुदायका उत्पादनलाई प्रदर्शनीमा स्थान दिन दुईवटा स्टल निःशुल्क उपलब्ध गराउने निर्णय गरेका छौँ,’ उनले भने ।
राउटे समुदायको सहभागिताका लागि ‘सोसेक नेपाल’ले नेतृत्व तथा समन्वय गर्नेछ। संस्थाको पहलमा समुदायका प्रतिनिधिहरूलाई प्रदर्शनीस्थलमा सहभागी गराई उनीहरूले परम्परागत सीपबाट तयार गरेका सामग्री प्रदर्शन तथा बिक्री गरिनेछ । यस पहलले राउटे समुदायको मौलिक उत्पादनलाई नयाँ बजारसँग जोड्नुका साथै उनीहरूको परम्परागत ज्ञान, सीप र सांस्कृतिक पहिचानलाई व्यापक रूपमा परिचित गराउन सहयोग पुग्ने अपेक्षा गरिएको छ। विशेषगरी आधुनिक प्रविधिको प्रदर्शनमा केन्द्रित कृषि मेलामा परम्परागत उत्पादनलाई समेत समेटिनुलाई रैथाने ज्ञान र आधुनिक प्रविधिबीचको सम्बन्ध स्थापित गर्ने प्रयासका रूपमा हेरिएको छ ।
कृषि विभागअन्तर्गतको राष्ट्रिय कृषि इन्जिनियरिङ तथा यान्त्रीकरण प्रवर्द्धन केन्द्र, हरिहरभवन, ललितपुर र नेपाल कृषि मेसिनरी व्यवसायी संघको संयुक्त आयोजनामा प्रदर्शनी हुन लागेको हो। बागमती प्रदेश सरकारको कृषि, पशुपन्छी, वन तथा वातावरण मन्त्रालय सहआयोजक रहेको छ ।कृप्रदर्शनीमा १०० भन्दा बढी प्रदर्शक, दुई हजारभन्दा बढी कृषि यन्त्र तथा उपकरण र २०० भन्दा बढी स्टल रहने आयोजकको अनुमान छ। तीन दिनसम्म सञ्चालन हुने प्रदर्शनी बिहान १० बजेदेखि साँझ ५ बजेसम्म खुला रहनेछ।आयोजकले ५० हजारभन्दा बढी दर्शकले अवलोकन गर्ने अपेक्षा गरेको छ।
प्रदर्शनीमा ट्र्याक्टर, कृषि ड्रोन, रोपाइँ तथा बाली व्यवस्थापनका उपकरण, सिँचाइ प्रविधि, हरितगृह र शीतभण्डारणलगायत आधुनिक कृषि प्रविधि प्रस्तुत गरिनेछन्। किसान, कृषि उद्यमी तथा व्यवसायीलाई नयाँ प्रविधिबारे जानकारी दिने र कृषि उत्पादनलाई आधुनिक, व्यावसायिक तथा प्रतिस्पर्धी बनाउन प्रोत्साहित गर्ने प्रदर्शनीको उद्देश्य रहेको छ।















प्रतिक्रिया दिनुहोस्